မြတ်စွာဘုရားမှာ စွမ်းရည်သတ္တိတွေက
အင်မတန်မှ ပြည့်စုံထက်သန်သည့် အတွက်ကြောင့် “ထူးမခြားနား သီချင်းကြီး” မှာ မကြာခဏ ကြားဖူးကြလိမ့်မယ်၊ ထူးတယ်၊ သို့သော် အချိန်ပိုင်းဟာ
မခြားနားဘူးဆိုတဲ့ အဓိပ္ပာယ်ကို ပြောတာ၊ ထူးတာမှ အလွန့်ကိုထူးတယ်၊ မြတ်စွာဘုရားက ရေ
မီး အစုံ ဆန့်ကျင်ဘက်ကို ဖန်တီးပြတဲ့အလုပ်ဟာ အင်မတန်လျင်မြန်မှ လုပ်လို့ရတာပဲ၊ ဝင်စားတဲ့
အဆင့်တွေက တစ်ခုပြီးတစ်ခုလုပ်လို့ရတာ၊ သို့သော် ကြည့်တဲ့ သူရဲ့မျက်စိထဲမှာ တစ်ပြိုင်နက်လို့
ထင်ရလောက်အောင် လျင်မြန်ရတယ်၊ မြတ်စွာဘုရားရဲ့ ပစ္စဝေက္ခဏ ဇောစိတ်ဟာ ၄-ကြိမ်လောက်နဲ့
ပြီးတယ်လို့ပြောတာ၊ ဆင်ခြင်တဲ့ စိတ်ကလေးဟာ ၄-ကြိမ်လောက်နဲ့ပဲ ပြီးအောင်လုပ်လုိ့ရတယ်၊
သိပ်မြန်အောင် လုပ်ရတတယ်လို့ ဆိုလိုတာ၊ အဲဒီဋ္ဌ ရေမီးအစုံ တန်ခိုး ပြာဋိဟာပြတာကို “ယမကပြာဋိဟာ”ယမက ဆိုတာ အစုံဆိုတဲ့ အဓိပ္ပာယ်ရတယ်၊
ရေနဲမီး အစုံအစုံပြတယ်။
ဆိုပါစို့ ဥပမာ - လက်ယာဘက်မျက်လုံးတော်က မီးတွေပန်းထွက်နေရင်
လက်ဝဲဘက်မျက်လုံးတော်က ရေတွေ ပန်းထွက်နေတယ်၊ လက်ယာဘက်နှာခေါင်းပေါက်က မီးတွေ ပန်းထွက်နေရင်
လက်ဝဲဘက်နှာခေါင်းပေါက်က ရေတွေ ပန်းထွက်နေတယ်၊ အဲဒီမှာ ရေထွက်အောင်က အာပေါကသိုဏ်း ဝင်စားပြီးတော့
အဘိညာဉ်နဲ့ ဖန်ဆင်းရတယ်၊ မီးဖြစ်အောင်က တေဇောကသိုဏ်း ဝင်စားရတယ်၊ အာရုံချင်း မတူဘူး၊
လေ့ကျင့်ရတာ၊ အာပေါကသိုဏ်း လေ့ကျင့်မှ ရေထွက်လို့ရတယ်၊ တေဇောကသိုဏ်း လေ့ကျင့်မှ မီးဖန်တီးလို့ရတယ်။
အဲဒါကို စဉ်းစားကြည့်၊ လက်ယာဘက်
မျက်လုံးထဲက ရေတွေ ပန်းထွက်နေတယ်၊ လက်ဝဲဘက် မျက်လုံးက မီးတွေ ပန်းထွက်နေတယ်၊ တစ်ပြိုင်နက်လို့
ထင်ရတယ်၊ လက်ယာဘက်မျက်လုံးထဲက မီးတွေပန်းထွက်နေတယ်၊ လက်ဝဲဘက်မျက်လုံးက ရေတွေ ပန်းထွက်နေတယ်၊
တစ်ပြိုင်နက်လို့ထင်ရတယ်၊ ဒီဇောစိတ်အစဉ်တွေဟာ ဘယ်လောက် လျင်မြန်တယ်ဆိုတာ စဉ်းစားကြည့်ပေါ့၊
မြတ်စွာဘုရား တန်ခိုးပြာဋိဟာ ပြတဲ့အခါ အဲဒီအချိန်ကြည့်တဲ့သူက မျက်တောင်ကလေးတစ်ချက်
ခတ်လိုက်တာနဲ့ တစ်ပြိုင်နက် ဘယ်နဲ့ညာ ရေမီးပြောင်းသွားတယ်၊ အဲဒီလောက်ထူးဆန်းအံ့ဖွယ်တန်ခိုးတွေ
ပြနိုင်တာဟာ အင်မတန်မှ အစွမ်းထက်လို့ ခုနက စွမ်းရည်သတ္တိတွေနဲ့ လေ့ကျင့်ထားလို့တဲ့၊
သာမန်ဆိုရင် မရဘူးတဲ့နော်။
ရဟန္တာတွေထဲမှာလည်း ရှင်မောဂ္ဂလာန်တစ်ပါးပဲ
တစ်ခိုးနေရာမှာ ထက်ထက်မြတ်မြတ် အကုန်လုံး တစ်ပြိုင်နက် လုပ်လို့ရတာ၊ ကျန်တဲ့ပုဂ္ဂိုလ်တွေက
အဆင့်မမီဘူးတဲ့၊ ဒီလောက်ကြီးမသွက်ဘူးပေါ့၊ မသွက်လို့ရှိရင် ကိုယ်ခံရမယ်၊ အန္တရာယ်တွေ
ကြီးတယ်ပေါ့၊ နန္ဒောပနန္ဒနဂါးမင်းဆိုတာ သာမန် မဟုတ်ဘူး၊ သူကလည်း အတော်အစွမ်းထက်တယ်၊ အစွမ်းထက်လို့
သူနဲ့ ယှဉ်ပြိုင်ပြီးတော့ လုပ်ရတယ်ဆိုတာ အင်မတန်မှ အန္တရာယ်ကြီးတယ်ပေါ့။
အဲဒါ စိတ်ကို အာရုံပေါ်မှာ လေ့ကျင့်ထားလိုက်တဲ့၊
သမထကျင့်စဉ်တွေရဲ့ အထွတ်အထိပ် အဘိညာဉ်ရောက်သွားတဲ့အခါ ဒီလိုဟာမျိုး ဖြစ်တယ်၊ မြတ်စွာဘုရားလက်ထက်က
များစွာသော ပုဂ္ဂိုလ်တွေ ဒီလိုထူးခြားတဲ့ စွမ်းရည်သတ္တိတွေကို ရရှိကြတယ်၊ ဘာဖြစ်လို့
ရရှိကြသလဲဆိုရင် စိတ်ကို အာရုံနဲ့လေ့ကျင့်လို့ပဲ၊ စိတ်ကို အာရုံနဲ့လေ့ကျင့်ပေးသည့်အတွက်ကြောင့်
ဒီလို အနေအထားမျိုးတွေ ရတာ။
စိတ်ဖြစ်စဉ်တွေက တစ်မျိုးစီပဲတဲ့၊
ခုနကလို ပရိကံ ဥပစာအနုလုံ ဂေါတြဘူ ဈာန်အဘိညာဏ် ဆိုပြီးတော့ ဖန်ဆင်းပြီးတော့ ဒီလိုသွားတာနော်၊
ဒါက သမထကျင့်စဉ်အရ လေ့ကျင့်တာကို ပြောတာ။
တစ်ခါ စိတ်ကို ဝိပဿနာအာရုံနဲ့ လေ့ကျင့်ပုံက
တစ်မျိုး၊ ဝိပဿနာအာရုံနဲ့ လေ့ကျင့်ရမယ်ဆိုရင် ရုပ်နာမ် ဓမ္မသင်္ခါရတွေ အပေါ်မှာ စိတ်ကို
လေ့ကျင့်ရတယ်။ လေ့ကျင့်ပြီဆိုတဲ့အခါမှာ မျက်စိလည်း မှိတ်ထားရမယ်၊ နားလည်းပိတ်ထားရမယ်၊
ဟုတ်လား? ပိတ်တယ်ဆိုတာ အဲဒီအာရုံတွေကို အာရုံမပြုရဘူး၊ ဝိပဿနာကျင့်စဉ်ဆိုတာ မနောဒွါရမှာ
ပိုပြီးတော့ အလုပ်လုပ်လာရတယ်။
သို့သော် ဒွါရ ၅-ပါးက ဝင်လာတဲ့အာရုံကို
မမှတ်ရဘူးလို့ ပြောတာ မဟုတ်ဘူးနော်၊ မျက်စိကမြင်တဲ့ အာရုံလည်း မှတ်လို့ရတယ်၊ ဒါက ရှေ့ပိုင်းက
လုပ်တာတွေကိုပြောတာ၊ နားက ကြားရတဲ့ အသံတွေကိုလည်း
မှတ်ရမယ်၊ ကြားရင် ကြားတယ် ကြားတယ်မှတ်၊ မြင်ရင် မြင်တယ် မြင်တယ်နဲ့မှတ်။ အဲဒီ မှတ်တယ်
ဆိုတာ သတိနဲ့ သမ္ပဇညကို လေ့ကျင့်နေတာလို့ ခေါ်တယ်၊ အဲဒါ ဆိုရင် လူတွေက ကြားရင် ကြားတော့
ကြားလိုက်တာပဲ၊ တခြားတွေးချင်တွေးနေမှာပဲလေ၊ ကြားတယ်ဆိုတဲ့အပေါ်မှာ သိချင်မှ သိလိုက်တာ၊
ဒါကြောင့် “သတိမမူ ဂူမမြင်” ဆိုတာလေ။ လူဆိုတာက ကြားချင်မှ ကြားလိုက်တာ၊ တစ်ခါတစ်လေ
အနီးနား ခေါင်းလောင်းတီးတာတောင်မှ ကြားချင်မှကြားလိုက်တာ၊ အတွေးလွန်နေရင် မကြားဘူး။
အဲဒါကြောင့်မို့ ဒွါရ ၅-ပါးမှာ
ထင်လာတဲ့ အာရဗုံတွေကို မှတ်ရ်း မှတ်ရင်းနဲ့ နောက်ဆုံးကျတော့ မနောဒွါရမှာ ဝင်လာတဲ့ အာရုံနဲ့
အလုပ်လုပ်သွားတယ်၊ အလုပ် လုပ်သွားတဲ့အခါမှာ ရုပ်နာမ်ဓမ္မသင်္ခါရတွေရဲ့ သဘာဝလက္ခဏာ
(Individual characteristic) ကို ကြည့်ရမယ်၊ နံပါတ် (၁) ရုပ်တ၇ားရဲ့ သဘာဝ လက္ခဏာ, နာမ်တရားရဲ့
သဘာဝလက္ခဏာ၊ ပင်ကိုယ် အရှိအတိုင်း၊ ဆိုပါစို့ - ဖဿဆိုရင် အာရုံနဲ့ ထိတွေ့တဲ့လက္ခဏာ ရှိတယ်၊
ပထဝီဆိုရင် မာတယ် ပျော့တယ်၊ အာပေါဆိုရင် ဖွဲ့စည်းတယ်၊ အရည်ဖျော်တယ်ဆိုတဲ့ ဒီလက္ခဏာတွေ၊
အဲဒီလက္ခဏာတွေကို ကြည့်တယ်။
သဘာဝလက္ခဏာကို ကြည့်လိုက်ခြင်းအားဖြင့်
ပထဝီကိုလည်း တွေ့တယ်၊ အာပေါကိုလည်း တွေ့တယ်၊ ဖဿကိုလည်းတွေ့တယ်၊ နာမ်တွေထဲက ဝေဒနာကိုလည်းတွေ့ပြီ
ဆိုတဲ့အခါမှာ အဲဒီ သဘာဝ လက္ခဏာတွေပေါ်မှာ အလုပ်လုပ်ရင်း ထပ်ဆင့် တွေ့လာတာက ဘာတုန်းဆိုရင်
- မမြဲတဲ့သဘော၊ မမြဲတဲ့သဘောကို အရင်တွေ့လာပြီဆိုလို့ရှိရင် မမြဲတဲ့အရာတစ်ခုသည် ကျေနပ်စရာမကောင်းသောကြောင့်
ဖြစ်မှု ပျက်မှုကြီးက အမြဲနှိပ်စက်နေလို့ ဒုက္ခဆိုတဲ့သဘောကို တွေ့လာတယ်၊ ဒုက္ခဆိုတဲ့ သဘောတွေ့လိုက်တာနဲ့
တစ်ပြိုင်နက် အနတ္တ-ကိုယ်မပိုင်ဘူး, သူဟာသူဖြစ်နေတာ၊ ကိုယ်က အုပ်ချုပ်လို့မရဘူး ဆိုတဲ့
ကိုယ်မပိုင်တဲ့ အနတ္တသဘောကိုလည်း တွေ့လာတယ်။
အနိစ္စ ဒုက္ခ အနတ္တလို့ ဆိုတဲ့ လက္ခဏာတွေ
တစ်ခုခုမြင်လိုက်တာနဲ့ တစ်ပြိုက်နက် ဝိပဿနာလမ်းကြောင်းပေါ် စတင်ရောက်သွားပြီလို့မှတ်ရမယ်၊
ဒါလည်း စိတ်ကို အာရုံနဲ့ လေ့ကျင့်တာပဲ၊ ဝိပဿနာကျင့်စဉ်နဲ့ စိတ်ကို အာရုံနဲ့ လေ့ကျင့်လိုက်တာ၊
အကျယ်တော့ မပြောတော့ဘူး၊ အကျယ်ကတော့ ရိပ်သာတွေမှာ ဟောနေတာပဲနော်။
အဲဒီလို စိတ်ကို အာရုံနဲ့ လေ့ကျင့်ပေးလိုက်တဲ့အခါ
ဉာဏ်စဉ်တွေဟာ တစ်ခုပြီးတစ်ခု တက်လာတယ်။ အသိဉာဏ်တွေ ထက်မြက်လာတယ်၊ သမာဓိစွမ်းအားတွေ
ရင်လာတယ်၊ ဉာဏ်စွမ်းအားတွေ ရင့်လာတယ်၊ နောက်ဆုံးကျတော့ သင်္ခါရတွေ အပေါ်မှာ စိတ်တည်တည်ငြိမ်ငြိမ်
ထားနိုင်ပြီ ချစ်ခြင်းမုန်းခြင်း ဆိုတာ ကင်းသွားတယ်။ အဆင့်မြင့်သွားတဲ့ အသိဉာဏ်တစ်မျိုးဖြစ်တဲ့
သင်္ခါရုပေက္ခဆိုတဲ့ ဉာဏ်ရသွားတယ်၊ သင်္ခါရုပေက္ခဆိုတာ သင်္ခါရတွေအပေါ်မှာ လျစ်လျူရှုနိုင်တယ်၊
သင်္ခါရတွေအပေါ်မှာ စိတ်ပျက်ခြင်း၊ ငြီးငွေ့ခြင်း၊ မုန်းခြင်း၊ ချစ်ခြင်း ဆိုတာတွေ မရှိတော့ဘဲ
သဘာဝကိုသိပြီး စိတ်တည်ငြိမ်မှုရလာပြီ။ အဲဒီတည်ငြိမ်မှုရလာပြီ ဆိုတဲ့အချိန်မှာ ဘာတွေလာတုန်းဆိုရင်
- စိတ်အစဉ်လေးက နောက်ဆုံးအဆင့် ရောက်လာပြီ ဆိုလို့ရှိရင် ဝိပဿာနာကျင့်စဉ်နဲ့ လေ့ကျင့်လိုက်ရင်
နောက်ဆုံးရောက်လာမယ့်ဟာ ခုနက ပြင်ဆင်နေတဲ့ ပရိကံဆိုတဲ့ မဟာကုသိုလ် ဉာဏသမ္ပယုတ်ဇော စောမယ်၊
ဒုတိယဇောက ဥပစာ၊ တတိယဇောက အနုလုံ၊ စတုတ္ထဇောကျတော့ ဂေါတြဘူ ဆိုတာလေးလာပြီးလိုက်လို့ရှိရင်
ဂေါတြဘူ လို့ ဆိုလိုက်တာနဲ့ တစ်ပြိုင်နက် သင်္ခါရတွေ မမြင်တော့ဘူး၊ ချုပ်သွားပြီ၊ သူယူလာတဲ့
အာရုံတွေဟာ ရှေ့ပိုင်းက သင်္ခါရတွေနဲ့ပဲ စခန်းသွားနေတယ်၊ လူ့ရဲ့စိတ်ဟာ အကုန်လုံးသင်္ခါရတွေနဲ့ပဲ
စခန်းသွားနေတာ။
အေး - ဂေါတြဘူ ရောက်တာနဲ့ တစ်ပြိုင်နက်
သင်္ခါရတွေနဲ့ စခန်းမသွားတော့ဘူး၊ သင်္ခါရတွေ ငြိမ်းတာနဲ့ သွားတွေ့တယ်၊ သင်္ခါရဆိုတဲ့ အာရုံတွေ
လွတ်သွားပြီတဲ့၊ လွတ်သွားတော့ နိဗ္ဗာန်ဆိုတဲ့ သင်္ခါရကင်းတဲ့ အာရုံတစ်ခု၊ အသစ်အဆန်းတစ်ခုကို
လှမ်းမြင်လိုက်ရပြီ၊ အဲဒီဂေါတြဘူစိတ် ဖြစ်ပြီးတာနဲ့ တစ်ပြိုင်နက် ဂေါတြဘူက သတ်မှတ်ပေးတဲ့
နိဗ္ဗာန် အာရုံပေါ်မှာ ဘဝသံသရာက အနုသယဓာတ်အနေနဲ့ ကိန်းနေတဲ့ ကိလေသာတွေဟာ အဆင့်ဆင့် ငြိမ်းသွားတယ်၊
သောတာပတ္တိမဂ်ဆိုရင် ဒိဋ္ဌိနဲ့ဝီစိကိစ္ဆာ ငြိမ်းသွားတယ်။
ဒါကြောင့်မို့ စိတ်ဖြစ်စဉ်ဟာ အဲဒီအတိုင်းပဲ
- “ပရိကံ, ဥပစာ, အနုလုံ, ဂေါတြဘူ, သောတာပတ္တိမဂ်,
သောတာပတ္တိဖိုလ်, သောတာပတ္တိဖိုလ်” ၂-ကြိမ်ဖြစ်ပြီးတဲ့အခါ ဇော ၇-ကြိမ်ပြည့်ရင်
ချုပ်ငြိမ်းသွားတယ်။
နောက်တစ်ခါပြန်ဝင်စားရင် မဂ်ဆိုတာ မလာတော့ဘူး၊
ဖလသမာပတ် ဝင်စားရင် ဟောဒီ ဝိပဿနာနဲ့ပဲ သွားရမယ်။ ဒီဖိုလ်ကို ပြန်လိုချင်ပြီ, ဒီအဆင့်ကို
ပြန်ရောက်ချင်တယ်ဆိုရင် ဝိပဿနာလမ်းကြောင်းက ထပ်လျှောက်၊ လျှောက်ရင် “ပရိကံ ဥပစာ အနုလုံ ဂေါတြဘူ (သို့မဟုတ်) ဝေါဒါန်ပြီးရင်
ဖိုလ် ဖိုလ်” ဟော၊ ဖိုလ်စိတ်တွေနဲ့ချည်းပဲ တစ်နေ့လုံးနေတာ၊
ဖိုလ်ဆိုတာ နိဗ္ဗာန်ကို အာရုံပြုတာ၊ ပရိကံ၊ ဥပစာ၊
အနုလုံဆိုတဲ့ စိတ်တွေကတော့ သင်္ခါရအာရုံနဲ့ဖြစ်တယ်။ ဂေါတြဘူ ဝေါဒါန်က သင်္ခါရချုပ်ငြိမ်းရာ
နိဗ္ဗာန်အာရုံကိုယူပေးတယ်။ ဥပမာမယ် လမ်းကြောင်းကြီးတစ်ခုကို လျှောက်လိုက်တာ လမ်းဆုံးသွားတာနဲ့
တစ်ပြိုင်နက် ချိုင့်ကြီးတွေ့တာပဲ၊ ဘာမှ မရှိတော့တာ တွေ့တာပဲ၊ သင်္ခါရအာရုံတွေပေါ်မှာ
လျှောက်လှမ်းသွားရင်းနဲ့ သင်္ခါရတွေ ချုပ်ဆုံးသွားတဲ့ နေရာကို တွေ့သွားတယ်၊ အဲဒါ နိဗာန်ပဲ၊
ခန့်မှန်းပြောဆိုတာ၊ ဟုတ်ကဲ့လား?
ဒါကြောင့်မို့လို့ “သင်္ခါရာနံ အပဝတ္တိမတံ္တ - သင်္ခါရတွေ မဖြစ်ဘဲနဲ့ သင်္ခါရတွေ ချုပ်ငြိမ်းသွားတဲ့နေရာက
နိဗ္ဗာန်ပဲ” လို့ ဒီလိုပြောတာနော်၊ ရှေ့ပိုင်းက
စိတ်တွေအားလုံးဟာ သင်္ခါရအာရုံနဲ့ စခန်းသွားနေတာ၊ သင်္ခါရအပေါ်မှာ တွေးနေတဲ့အတွေးနဲ့သွားပြီး
နောက်ဆုံး အဲဒီ သင်္ခါရအာရုံတွေဟာ တဖြည်းဖြည်းနဲ့ လျော့လျော့သွားပြီးတော့ နောက်ဆုံး သင်္ခါရအာရုံတွေ
ပျောက်သွားတယ်၊ သင်္ခါရမရှိတဲ့ အာရုံတစ်ခု ရသွားတယ်နော်၊ အဲဒါ ဖိုလ်စိတ်တွေနဲ့ တစ်နေကုန်နေရင်လည်း
ဖိုလ်စိတ်တွေ ဖြစ်နေမှာပဲ ထိန်းထားနိုင်တယ်၊ အဲဒါ ဖလသမာတ် ဝင်စားတယ်လို့ခေါ်တယ်။
အဲဒီအတိုင်းပဲ သောတာပန်ဖြစ်ပြီးရင်
နောက် သကဒါဂါမ် ဖြစ်ဖို့အတွက် ဝိပဿနာကျင့်စသ်ကို တိုးမြှင့်ရမယ်၊ သကဒါဂါမ်ဖြစ်ပြီးရင်
အနာဂါမ်ဖြစ်ချင်ရင် ဝိပဿနာကျင့်စဉ်ကို တိုးမြှင့်ကျင့်ရမယ်၊ level ချင်း degree ချင်း
မတူဘူး၊ အနာဂါမ်ဖြစ်ပြီးရင် ရဟန္တာဖြစ်ဖို့အတွက် ဝိပဿနာစွမ်းအားကို တိုးမြှင့်ရမယ်၊
တိုးမြှင့်တဲ့အခါ ရဟန္တာဖြစ်လောက်တဲ့ ဝိပဿနာစွမ်းအား ရလောက်ပြီဆိုလို့ရှိရင် အရဟတ္တမဂ်
အရဟတ္တဖိုလ် ရောက်ပြီး နောက်ဆုံးမှာ ရဟန္တာထိအောင် ရောက်သွားတယ်။
ဒါတွေဟာ စိတ်ကို အာရုံနဲ့လေ့ကျင့်ခြင်းလို့
ခေါ်တယ်နော်၊ စိတ်ကို လေ့ကျင့်လိုက်လို့ရှိရင် ဈာန်လည်းရတယ်၊ မဂ်လည်း ရတယ်၊ ဖိုလ်လည်းရတယ်။
အဲဒီလို လေ့ကျင့်ပြီးတော့ စိတ်ကို အာရုံနဲ့ လေ့ကျင့်သွားနိုင်မှသာလျှင် ဒါတွေရနိုင်တယ်၊
သာမန်အားဖြင့်ကတော့ မလေ့ကျင့်ဘူးဆိုလို့ရှိရင် ဒီ ကာမအာရုံတွေ ထဲမှာပဲ တစ်လည်လည် ဒီလို
နေဦးမှာပဲတဲ့၊ ထွက်လမ်းဆိုတာ မရနိုင်သေးဘူး။
ဒါ့ကြောင့်မို့လို့ တရားချစ်င်
သူတော်စင်ပရိသတ်အပေါင်းတို့သည် မိမိတို့ရဲ့ စိတ်ကလေးကို ထူးခြားဖို့ရာအတွက် အာရုံတစ်ခုခုနဲ့
ယှဉ်တွဲပြီး အပြစ်ကင်းတဲ့အာရုံပေါ်မှာ လေ့ကျင့်ခြင်းဖြင့် ဈာန်တရား မဂ်တရား ဖိုလ်တရား
နိဗ္ဗာန်တရားများကို ကိုယ်စီကိုယ်ငှ မျက်မှောက်ပြုနိုင်ကြပါစေ။
***ဒေါက်တာနန္ဒမာလာဘိဝံသ၏
အဘိဓမ္မာမြတ်ဒေသနာ(ဒုတိယတွဲ) မှ ပူဇော်ပါသည်။
*** အခန်း - ၇ သတ္တဝါတို့၏ ၃၁-ဘုံအကြောင်း ဆက်လက်ပူဇော်ပါမည်။
