မိတ်ဆွေတစ်ယောက်ကမေးခိုင်းလို့ပါ
ဘုရားရှင်ဟောကြားတဲ့.နတ်ဗြဟ္မာတွေအကြီးအကျယ်ကျွတ်တမ်းဝင်တဲ့အခါကြီးသုံးခါရှိတယ်တဲ့
အဲဒါဘယ်အခါတွေလဲ အရှင်ဘုရား
ဖြေကြားပေးပါ အရှင်ဘုရား.... တဲ့၊
----------------------
သည်မေးခွန်းကို ၁၃၇၀-ခုနှစ်မှာ ဗုဒ္ဓစာပေအဖွဲ့က ပြန်လည်ထုတ်ဝေတဲ့ ရှေးဟောင်းကျမ်းတစ်ဆူဖြစ်တဲ့ တထာဂတဥဒါနဒီပနီကျမ်း ဒုတိယတွဲ နှာ-၇၃၇ က ယူပြီး အရင်ဆုံး ဖြေပေးပါ့မယ်။
ဘုရားရှင်ဟောကြားတဲ့ နတ်ဗြဟ္မာတွေ အကြီးအကျယ်ဆုံးကျွတ်တမ်းဝင်တဲ့ အခါ (၃)ခါတွေက---
၁။ ဓမ္မစကြာဒေသနာတော်ကို ဟောတော်မူတဲ့ အခါ၊(ပထမာဘိသမယ)
၂။ မင်္ဂလသုတ်တော်ကို ဟောတော်မူတဲ့ အခါ။(ဒုတိယာဘိသမယ)
၃။ စူဠရာဟုလောဝါဒသုတ်ကို ဟောတော်မူတဲ့ အခါ(တတိယာဘိသမယ)-တွေလို့ အဲဒီကျမ်းမှာ ဆိုပါတယ်။
သို့သော်လည်း အဋ္ဌကထာတွေကို ကြည့်ရှုလိုက်ပြန်တော့ သမစိတ္တသုတ်ဟောတဲ့အခါ၊ မဟာသမယသုတ်ဟောတဲ့အခါ၊ မင်္ဂလသုတ်ဟောတဲ့အခါ၊ စူဠရာဟုလောဝါဒသုတ်ဟောတဲ့အခါ၊ အဲဒီ(၄)ခါတွေမှာ နတ်ဗြဟ္မာတွေ အကြီးအကျယ်ဆုံး ကျွတ်တမ်းဝင်ကြတယ်လို့ ဖွင့်ပါတယ်။
အဲဒီအဖွင့်မှာ ဓမ္မစကြာဟောတဲ့အခါ ပါမလာဘူး၊ ဒီအဖွင့်အလိုဆိုရင် (၄)ခါလို့ ပြောရမယ်။
ယထာ စ ဤမသ္မိံ သမာဂမေ၊ ဧဝံ မဟာသမယသုတ္တေ မင်္ဂလသုတ္တေ စ စူဠရာဟုလောဝါဒသုတ္တေ စ ကောဋိသတသဟဿဒေဝတာ အရဟတ္တံ ပါပုဏိံသု, သောတာပန္နာဒီနံ ဒေဝမနုဿာနံ ပရိစ္ဆေဒေါ နာဟောသိ။(အံ၊ ဌ-၂၊ ၃၉)
နောက်တစ်ခု- သုတ္တနိပါတ်အဋ္ဌကထာ ပရာဘ၀သုတ်အဖွင့်မှာ
‘‘မဟာသမယသုတ္တေ စ, အထော မင်္ဂလသုတ္တကေ;။
သမစိတ္တေ ရာဟုလောဝါဒေ, ဓမ္မစက္ကေ ပရာဘဝေ။။
‘‘ဒေဝတာသမိတီ တတ္ထ, အပ္ပမေယျာ အသင်္ခိယာ;။
ဓမ္မာဘိသမယော စေတ္ထ, ဂဏနာတော အသင်္ခိယော’’တိ။ (သုတ္တနိ၊ဋ္ဌ၊၁၊၁၅၆။) လို့ ဖွင့်ထားတာတွေရပြန်တယ်။
အဓိပ္ပာယ်က-မဟာသမယသုတ်၊ မင်္ဂလသုတ်၊ သမစိတ္တသုတ်၊ စူဠရာဟုလောဝါဒသုတ်၊ ဓမ္မစက္ကပ၀တ္တနသုတ်(ဓမ္မစကြာ)၊ ပရာဘ၀သုတ်-ဆိုတဲ့ သုတ်တော်(၅)သုတ်ဟောတော်မူတဲ့ အချိန်မှာ မရေတွက်နိုင်တဲ့ နတ်ဗြဟ္မာတွေ တရားထူး ရကြတယ်လို့ ဆိုပါတယ်။
မိလိန္ဒပဉှာပါဠိတော်မှာမိန့်ဆိုတာတွေကိုတော့ ချန်ထားခဲ့ပါတော့မယ်။
ဒီတော့ မေးခွန်းရှင် မေးတဲ့ " ဘုရားရှင်ဟောကြားတဲ့ နတ်ဗြဟ္မာတွေ အကြီးအကျယ်ဆုံးကျွတ်တမ်းဝင်တဲ့ အခါ (၃)ခါ" ဟာ တထာဂတဥဒါနဒီပနီမှာ ပါတဲ့ ပထမာဘိသမယ၊ ဒုတိယာဘိသမယ၊ တတိယာဘိသမယ တွေကို ကြည့်ရှု မှတ်သားပြီး မေးတယ်လို့ ယူဆရမယ်ထင်ပါတယ်။
ဒါကတော့ ဦးဇင်းရှာဖွေတွေ့ရှိတာတွေကို အမေးရှင် ဗဟုသုတရအောင် ဖြေပေးလိုက်တာပါ။ အကယ်၍ မိမိစိတ်ထဲမှာ ကျေနပ်မှုမရှိသေးရင် ပညာရှင်တွေထံမှာ ဆက်လက်လေ့လာ မှတ်သားပါဦးလို့ တိုက်တွန်းချင်ပါတယ်။ အသိဉာဏ်ရော အတွေ့အကြုံပါ အလွန်နုနယ်သေးသည်အတွက် အမှားတွေ့ရင်လည်း ညွှန်ပြပြောဆိုခြင်းဖြင့် ကူညီပေးစေလိုပါတယ်။
♣♣♣♣ ရွှင်လန်းချမ်းမြ့ပါစေ ♣♣♣♣
