အနာဂတ်သာသနာရေး အပိုင်း(၄၅) ဗုဒ္ဓရှင်တော်နှင့်ပဉ္စ၀ဂ္ဂီ

ဗုဒ္ဓရှင်တော်နှင့်ပဉ္စ၀ဂ္ဂီ

ပဉ္စ၀ဂ္ဂီတို့နှင့်တွေ့ပုံ

ထိုသို့  ဆွမ်း စသည်ကို  စားတော်မူလျှင် မကြာခင်နဂိုအသားအရေဖြစ်၍ လမ်းမှန် ကျကျ တရားအားထုတ်တော်မူလေရာ ပထမဈာန်မှ စ၍ လောကီ ဈာန်ကို ရတော်မူပြီးလျှင် အတော်ကြာသောအခါ ဗုဒ္ဓအခန်း၌ ပြခဲ့သည့်အတိုင်း ဗုဒ္ဓအဖြစ်သို့ ရောက်တော်မူပြီးနောက် တရားဦး ဟောဖို့ရန် ပဉ္စ၀ဂ္ဂီတို့ ရှိရာ မိဂဒါဝုန်တောသို့ ကြွတော်မူလေသော် ပဉ္စ၀ဂ္ဂီတို့သည် ဗုဒ္ဓရှင်တော်မြတ်ကို ““ဗုဒ္ဓ မဖြစ်သေး””ဟု အယူရှိ သောကြောင့် ““ငါ့ရှင် ဂေါတမ””ဟု ပြောဆိုကြလေသည်။

ပဉ္စ၀ဂ္ဂီ  ။         ။         ငါ့ရှင် ဂေါတမ… ဥရုဝေလတော၌ ကမ္မဋ္ဌာန်းအား ထုတ်နေစဉ် ကျုပ်တို့က ငါ့ရှင်ရဲ့ သပိတ်, သင်္ကန်းကို ယူပြီး (ဟိုဟိုသည်သည်)လှည့်လည်ခဲ့ကြတယ်နော်၊ မျက်နှာသစ် ရေ, တံပူတို့ကိုလည်း ပေးခဲ့ကြတယ်၊ ငါ့ရှင်နေတဲ့ ကျောင်း တလင်းကိုလည်း တံမြက်လှည်းခဲ့ကြ တယ်၊ သည့်နောက် ကျုပ်တို့ ဒီရွှေ့လာတဲ့အခါ ဘယ်သူက ၀တ်ကြီး ၀တ်ငယ် ပြုပါသလဲ။

ဗုဒ္ဓ      ။         ။         ဘိက္ခုတို့… ငါ့ကို (ဂေါတမ ဟု) နာမည်မခေါ်ကြနှင့်၊ ငါ့ရှင်လို့လည်း မပြောကြနှင့်၊ ယခု ဗုဒ္ဓ ဖြစ်လာပြီ၊ အမတ တရား (နိဗ္ဗာန်တရား)ကို ငါသိပြီ၊ နားထောင်ကြ၊ တရား ဟောပြမည်၊ ဟောတဲ့အတိုင်း ကျင့်ကြလျှင် မကြာခင်ပင် မြတ်သောတရားကို ကိုယ်တိုင် သိမြင်ကြရလိမ့်မည်။

ပဉ္စ၀ဂ္ဂီ  ။         ။         (ဗုဒ္ဓဖြစ်တယ်ဆိုတာကို မယုံနိုင်ကြသဖြင့်) ငါ့ရှင်ဂေါတမ… ခဲခဲယဉ်းယဉ်းနှင့် အပင်ပန်းခံပြီး (ပဲပြုတ်ရည် ကလေး တစ်လက်ခုပ်လောက် သောက်လျက်) ကျင့်တုန်းကမှ ဗုဒ္ဓမဖြစ်နိုင်ဘဲနှင့် ယခုလို ပစ္စည်းလာဘ် ပေါများအောင် ဟိုလည် ဒီလည် လည်ပြီးလျှင် ကမ္မဋ္ဌာန်းမှ ထွက်ခွာ၍ အစားအသောက်တွေ စားနေခါမှ ဗုဒ္ဓဖြစ်တယ် ဆိုတာ ဘယ်မှာ ဟုတ်နိုင်မှာလဲ။

ဗုဒ္ဓ      ။         ။ ဘိက္ခုတို့ … ငါသည် ကမ္မဋ္ဌာန်းမှ  ထွက်၍ ပစ္စည်း ပေါများအောင်  လှည့်လည်နေသည်  မဟုတ်၊  ဗုဒ္ဓဖြစ်ပြီး အမတ (နိဗ္ဗာန်)ကို သိပြီ၊ သင်တို့ နားထောင်ကြ, တရား ဟောမည်၊ ဟောတဲ့အတိုင်း ကျင့်ကြလျှင် မကြာခင် တရားထူးကို ကိုယ်တိုင် သိကြရလိမ့်မည်။

[ ဤသို့ သုံးကြိမ် မိန့်တော်မူသည်။]

                   ဘိက္ခုတို့… သင်တို့သည် (ဥရုဝေလတောမှာ နေကြ စဉ်က) ငါ့အပေါ်၌ ““ဗုဒ္ဓ ဖြစ်တော့မှာပဲ””ဟု အမျှော်ကြီး မျှော်လင့်၍ နေကြတယ် မဟုတ်လား၊ ထိုအခါတုန်းက (သင်တို့ စိတ်အားထက်သန်ပါစေတော့ဟူသော သဘော ဖြင့်) ““ငါ့မှာ အရောင်အ၀ါတွေ ထွက်ပေါ်လာပြီ၊ မကြာမီ ဗုဒ္ဓ ဖြစ်တော့မည်””စသော စကားမျိုးကို ပြောဖူးသလား။

ပဉ္စ၀ဂ္ဂီ  ။         ။         (အထက်ပါ စကားကို မိန့်တော်မူလိုက်လျှင်)… ““ဟုတ်သားဘဲ, ငါတို့ အမျှော်ကြီး မျှော်နေတုန်းက ဒီစကားကို မပြောခဲ့ဘဲ ယခုမှ ပြောခြင်းကို ထောက်လျှင် ဗုဒ္ဓ ဖြစ်ဟန်တူတယ်””ဟု သဘောပေါက်လာကြ၍ ““ရှေးက ဒီစကားမျိုး မပြောပါဘူးဘုရား””ဟု တစ်ပြိုင်နက်လျှောက် ထားကြလေသည်။

ဗုဒ္ဓ      ။         ။ ယခု ငါ ဗုဒ္ဓ ဖြစ်လာပြီ၊ အမတ (နိဗ္ဗာန်)ကို သိပြီ၊ သင်တို့ နားထောင်ကြ၊ ငါ သွန်သင်ပြသမည်၊ သွန်သင်ပြသသော နည်းအတိုင်း လိုက်နာကြလျှင် မကြာခင်ပင် တရား ထူးကို ကိုယ်တိုင် သိကြရလိမ့်မည်။ [ ဤသို့ မိန့်တော်မူပြီး လျှင် ““ဓမ္မစကြာ””တရားဦးကို ဟောတော်မူသည်။]